小李博log: FACE - 231 - 電訊型科 iOS 5教學　升呢功能詳細玩

FACE - 231 - 電訊型科 iOS 5教學　升呢功能詳細玩

近排茶餘飯後總有朋友、同事問：「升咗未？升唔升好？」
iPhone、 iPad系統已經可以升級至 iOS5，但其實唔少人買 iPhone、 iPad用咗成年，除咗開機認證之外從無插過落電腦同步，更不知升級為何物！
咁我部機升唔升好？有乜新功能玩？我唔係用雙核 4S，升級後會唔會拖慢舊機？其實 iOS5大增功能之餘，仲優化埋舊機效能，咁多好嘢都唔升，喬布斯靈魂都唔 happy、唔敢升天呀！家示範 iOS5活用秘技你睇，睇完包你都想即刻升級。

Find My Friends想搵朋友請先搵 app

iPhone 4S發表當日介紹咗 iOS5新功能 Find My Friends，可以互相分享 iDevice用家嘅位置。但升完級就唔見用到，原來要先去 App Store下載「 Find My Friends」 app，入去做 setting，聯絡資料上面要有該朋友 email，大家互相接受邀請方可分享位置，唔使驚有人搵到你喺邊度搞生日會咁天方夜譚。

放大圖片

就算已經分享位置，關閉定位功能或者喺設定入面校咗隱藏都可以唔俾人知道行蹤，不過另一半硬係要 check你，真係麻煩過 fb打咭，教唔教你女/男朋友用，自己諗諗！

放大圖片

要喺 App Store下載先玩到，免費，但係邀請功能要有對方連結咗 iDevice嘅 email，頗不方便。

影相拍片鎖機極速始動

相機功能亦係另一大執地方，可以用音量+掣當快門影相，就唔少人都知。另外喺機身鎖定畫面連按兩下 home掣，就可以叫出相機捷徑，即開即拍，撞到 Jessica.C偷錢可以即時拍低，仲用 iOS4？你入得 password、揀埋相機 icon，開得機佢都閃埋啦！

放大圖片

按兩下 home掣就會見到右下角相機捷徑，即按即影， set了密碼的話影完相想睇相都要先入密碼，借機畀人影相都唔怕。

放大圖片

新增四大編輯相片功能，包括旋轉照片、自動執相、消除紅眼，同剪裁。

放大圖片

用後鏡頭自拍，手指篤芒總係唔順手，家可以按機邊+掣當快門，爽好多。想 zoom近咁影，只需要當睇相咁用雙指扯大就得，唔一定要篤芒底條 zoom in/out棒。

iMessage慳 SMS錢

iMessage初公布時話係 WhatsApp勁敵，但係升咗上去都唔見有呢個 app。原來呢個功能整合咗入 SMS，當你 send SMS畀其他 iOS5用家，就會自動變為 iMessage，直接用數據傳輸，免去跨網短訊費用。更大用處係令 iPad都有訊息功能，而訊息仲會同步晒落你戶口名下其他「 i物」，同 WhatsApp用法頗為不同。

放大圖片