「曾經有一份至真嘅愛情擺喺我面前，但我無去珍惜，到冇咗嘅時候，先至後悔莫及。如果上天可以俾個機會我返轉頭嘅話，我會對個女仔講三個字：我愛你！如果係都要喺呢份愛加個期限，我希望係一萬年！」
說以上對白的，是周星馳；寫的，卻是另有其人。
他其貌不揚，一時是煞有介事的菩提老祖，一時又是蝦蝦霸霸但成日肚餓的技安。
老友王家衛拍《東邪西毒》和《 2046》出事，他可以急就章整套《東成西就》和《天下無雙》。
周星馳開拍《功夫》，指定他任監製。我們口中的「星爺」，對他來說只是「星仔」。
約女友食 lunch，他約她去菲律賓，人家父親還差點以為他兼職走粉。
他滿腦鬼主意，一身神經刀，半生嘻嘻哈。
「我只不過係一個精神分裂嘅蛋散。」
他甚至會把人類形容成「蛋散」、「粉皮」、「粉腸」等茶樓小點。
他最近拍了新戲，明玩特技，暗搞愛情，貫徹始終地精神分裂。
這人，叫劉鎮偉。
呢條粉皮
劉鎮偉新戲《機器俠》運用了大量特技，很多人拿它跟近期大熱的《變形金剛》（《 Transformers》）比較。
「我絕對唔怕同人比較，你班 Transformers邊識打功夫？我 quality未必贏，但至少有創意，起碼中國出咗第一個機械人。
「我唔行前一步，只會永遠俾歐美拋離。中國向來不知有幾多無名英雄，我怕乜做其中一個？」
這是一位很牛的導演。市場流行的他不拍，愈是離經叛道的他愈喜歡。俗不可耐的喜劇，又會有賺人熱淚的窩心對白。明明在搞高科技，自己對電腦卻一竅不通，今時今日還不懂用電話 send SMS。
「劉鎮偉呢條粉皮，基本上係精神分裂。」他這樣形容自己。
無諗過做經典
自稱「粉皮」，真過癮。也許只有這樣「精神分裂」的人，才拍得出無厘頭典範《賭聖》，也會有反傳統的《西遊記》。
「嗱，你又想解讀劉鎮偉？我上清華大學演講，就係叫你哋班友唔好講到我懶有抱負。佢哋話《西遊記》『後現代』，我到依家都唔知乜嘢係『後現代』。我只不過係一個導演，寫劇本時從來無諗過要做經典。」
這可能就是無心插柳柳成蔭。《西遊記》在香港上畫時毀譽參半，評語是「睇唔明，唔知佢搞乜」。豈料在大陸上畫後卻受大學生激烈追捧，當中對白「若然要在愛情上加個期限，是一萬年」，被捧為經典中的經典；他客串的「菩提老祖」，更被奉若神明。
「國內咁勁，因為我打破咗兩個傳統。一，我加咗條愛情線俾孫悟空；二，以往演繹孫悟空嘅方式都係京劇，我用咗現代方式去演。
「因為文化差異，大陸觀眾睇到香港觀眾睇唔到嘅。香港有幾大？每日返工放工，一係同阿媽食飯，一係同條仔拍拖，全部發生喺同一個地方。大陸人穿州過省打工，世界可以好大。今日個男仔可以喺北京火車站話好愛我，聽日亦可以喺湖南鍊死我……文化唔同，視野點會一樣？」
我都係叫佢星仔
就是因為有不一樣的視野，劉鎮偉有本事令周星馳多年來一直心悅誠服。九○年的《賭聖》他令周星馳一炮而紅，○四年周星馳拍《功夫》，指定要他任監製。劉鎮偉也不是省油的燈，開出條件，要周星馳不可在片場罵人，他才答允。他是少數沒有跟周星馳鬧意見的電影人。
「佢係一個聰明人，而我嘅角色就好似佢阿媽，不但睇住佢成長，仲係不問回報。佢身邊有太多人想攞佢嘢，又有太多擦鞋仔，得我一個講真說話。」
我們口中的「星爺」，劉鎮偉依然叫「星仔」。「前兩日打嚟，我都係叫佢『星仔』；佢就叫我『摭虎』（劉鎮偉洋名 Jeff）。」
「摭虎」對「星仔」，像母親，也像心理醫生，永遠循循善誘。
「我叫佢記住，當一個人唔再同你打工，唔再在你身上得到任何利益，佢就係同你平起平坐。萬一佢同你反面，你就落唔到台。」
劉鎮偉身邊的猛人，豈止一個周星馳。八十年代初，他從英國留學回來，加入一家菲律賓財務公司主理基建項目，後來公司開拓電影市場，便由他負責。八一年，他拿着七千萬到美國傾院線，生意未傾成，大老闆下台，一切泡湯。
「傾得成的話，會係一盤十億嘅大生意！十億都可以無，仲有乜值得計較？」
沒有留言:
張貼留言